Me ftesë të Universitetit UJEP në Ústí nad Labem, Çeki, dhe në kuadër të projektit të shkëmbimit Erasmus+ ndërmjet këtij universiteti dhe Departamentit të Gjermanistikës dhe Departamentit të Anglishtes të Fakultetit të Filologjisë në Universitetin e Prishtinës, disa pjesëtarë të stafit akademik të fakultetit mbajtën ligjërata për studentët dhe stafin e UJEP-it.

Ligjëratat u pritën shumë mirë nga studentët dhe stafi i universitetit mikpritës dhe zgjuan interesim të madh për temat e trajtuara, duke kontribuar në shkëmbimin akademik dhe në forcimin e bashkëpunimit ndëruniversitar.

Si rezultat i këtij bashkëpunimi, në Universitetin UJEP u organizua edhe Muaji i Gjuhës dhe Kulturës Shqiptare. Në kuadër të këtij aktiviteti u mbajt një koncert i muzikës klasike me këngë shqiptare, si dhe u shfaq një film kosovar. Këto aktivitete u mbështetën nga Ambasada e Republikës së Kosovës në Pragë.

Aktualisht, gjatë semestrit veror 2026, katër studente të Departamentit të Gjermanistikës po ndjekin studimet në Universitetin UJEP në kuadër të programit Erasmus+, duke përfituar nga mundësitë e mobilitetit akademik dhe shkëmbimit ndërkombëtar.