Pesë programe të Fakultetit të Filologjisë të nivelit bachelor dhe master janë vlerësuar të enjten nga ekspertët ndërkombëtarë, në kuadër të procesit të riakreditimit të tyre. Ekspertët e përzgjedhur nga Agjencia Kosovare e Akreditimit kanë realizuar takimet virtuale me menaxhmentin e fakultetit, me prorektorin për zhvillim dhe cilësi i Universitetit të Prishtinës “Hasan Prishtina”, prof. ass.dr. Elton Bahtiri, si dhe me bartësit e programeve, stafin, studentët, të diplomuarit dhe përfaqësuesit e tregut të punës. Vlerësimi për programet ka kaluar në frymën e diskutimeve rreth ngritjes së cilësisë dhe sfidave të mësimdhënies dhe mësimnxënies, sidomos tash gjatë pandemisë kur mësimi është duke u realizuar në distancë.